Prezident Shavkat Mirziyoyev Qaraqalpaqstanǵa keldi

 

Prezidentimiz Shavkat Mirziyoyev aymaqlardaǵı sociallıq reformalardıń barısı, iri joybarlar menen tanısıw, xalıq penen pikirlesiw maqsetinde 21-sentyabr kúni Qaraqalpaqstan Respublikasında boldı.

 

 

Mámleketimiz basshısı dáslep Nókis qalasındaǵı «Shorsha baba» qoyımshılıǵına barıp, Musa Erniyazovtıń maqbarasın zıyarat etti. Quran oqıldı.

 

 

 

 

Musa Erniyazov kóp jıllar Qaraqalpaqstan Joqarǵı Keńesiniń Baslıǵı lawazımında islegen. Ózbekstan Respublikası Oliy Majlisi Senatı Baslıǵınıń orınbasarı, Ózbekstan Qaharmanı bolǵan.

 

Prezidentimizdiń kórsetpesine muwapıq, marhumnıń esteligine maqbara qurıldı. Búgin bul jer abat zıyarat orınlarınan birine aylanǵan.

 

Prezident Shavkat Mirziyoyev Bozataw rayonına kelip, «Jaslıq» mákan puqaralar jıyınında jasaytuǵın Júginis Jumanazarovtıń shańaraǵında miyman boldı.

 

 

 

Júginis aǵa ómirlik joldası Salima apa menen bes qızdı tárbiyalap kamalǵa keltirgen. Olar bilimlendiriw, mádeniyat, awıl xojalıǵı, ekonomika tarmaqlarında jumıs islemekte. Kishkene qızı Ulzada Jumanazarova karate boyınsha Ózbekstan chempionı.

 

Mámleketimiz basshısı shańaraqtıń turmıs tárizi, olardıń tımsalında pútkil bozatawlılardıń jasaw sharayatları menen qızıqsındı.

 

 

Shańaraq qıytaq jerden ónimli paydalanbaqta. Íssıxana shólkemlestirilgen miyweli terekler hám palız ónimleri jetistirilmekte.

 

– Bozatawda ázelden miynetkesh adamlar jasaydı,-dedi Shavkat Mirziёev. – Jeri zúráátli, shorı joq. Biraq uzaq jıllar imkaniyatlar tallanbay, biraz itibarsız qalǵan edi. Bozataw xalqınan qarızımız bar edi. Eń jaqın oray – Kegeyli rayonınıń orayına shekem derlik 100 kilometr edi. Endi bul jerdiń ózinde sharayat jaratıp, mámleketlik xızmetlerdi jolǵa qoyıp, jumıs orınların shólkemlestiriwge háreket etip atırmız. Isbilermenlerdi isendirip, subsidiya bersek, infrastrukturanı jaqsılap, xalıqtı kóship keliwge tartsaq, bul aymaq úlken imkanyatlarǵa iye.

 

Bozataw rayonı mámleketimiz basshısınıń baslaması menen 2019-jılı qayta shólkemlestirilgen edi. Keyingi eki jılda bul jerde kóp qabatlı turaq jaylar, sawda kompleksleri, mıń orınlıq amfiteatr, sport maydanı, Jaslar orayı qurıldı, jollar ońlandı. Toqımashılıq kárxanası jumıs basladı.

 

Shańaraqtan shıǵıwda bozatawlı ekologlar, jergilikli xalıqtıń wákilleri menen sóylesti.

 

– Ishki imkaniyatlardan paydalanıp, tınımsız háreket etpesek, nátiyje bolmaydı. Sonıń ushın Bozataw rayonın rawajlandırıw boyınsha óz aldına qarar qabıl etiw maqsetindemiz. Máselen, rayonda 11 mıń gektar zúráátli jer paydalanılmay tur. Endi bul jerdi aldınǵı wálayatlardan birine biriktirip, nasosların tiklep, jaqsı násil hám sortlar alıp kelip, jetistirilgen ónimlerdi satıp alatuǵın sistema shólkemlestiremiz, – dedi Prezident.

 

Rayon xalqı aymaqtaǵı ózgerislerdi aytıp, bul baǵdardaǵı itibarı ushın mámleketimiz basshısına minnetdarshılıq bildirdi.

 

Shavkat Mirziyoyev Bozatawda qaraqalpaqstanlı saylawshılar menen ushırastı.

 

 

 

Prezident Shavkat Mirziyoyev Qaraqalpaqstan medicina institutı janındaǵı balalar klinikasın barıp kórdi.

 

Mámleketimiz basshısı bunnan tórt jıl aldın onıń qurılısına tırnaq tasın qoyǵan edi. Bul kompleks usı ayda paydalanıwǵa tapsırıldı.

 

Klinika stacionar sharayatta jılına 3 mıń 600, ambulator tárizde 22 mıń 400 nawqasqa xızmet kórsetiw quwatlılıǵına iye. Bul jerde tuwma hám sozılmalı kesellikleri bar balalarǵa joqarı texnologiyalar tiykarında diagnoz qoyıladı hám emlenedi. Balalar kardioxirurgiyası, kishi invaziv xirurgiya, neyroxirurgiya, oftalmologiya, otrinolaringologiya, bet-jaq xirurgiyası, ortopediya hám ginekologiya bólimleri zamanagóy úskeneler menen támiyinlengen.

 

 

 

Emlewxanada 300 ge shamalas adam isleydi, professor-oqıtıwshılar hám medicina xızmetkerleri Qubla Koreya, Yaponiya, Avstriya, Rossiya sıyaqlı mámleketlerdegi aldınǵı klinikalarda tájiriybe arttırıp kelgen.

 

Prezidentimiz bul jerde emlenip atırǵan balalardı kórip, anaları menen sáwbetlesti.

 

 

–  Analardıń baxtı – perzent. Mine usı baxıttı qásterlep saqlaw, nawqas balalardıń tezirek táwir bolıwı, salamatlarınıń kesel bolmawı ushın hámme háreketlerdi isleymiz, – dedi Shavkat Mirziyoyev.

 

 

Institutta medicinalıq bilimlendiriw, ilim hám xalıqaralıq birge islesiwdi rawajlandırıw ushın zamanagóy sharayatlar jaratılǵan.

 

Mámleketimiz basshısı bul jerde ámeliyat ótep atırǵan institut studentleri menen de sóylesti. Medicinalıq bilimlendiriw mákemelerinde málimleme texnologiyaları boyınsha oqıw sabaqların kóbeytiw zárúr ekenligi atap ótildi.

 

 

Prezident Shavkat Mirziyoyev Nókis qalasında bolıp atırǵan Jaslar festivalına bardı.

 

 

 

– Házir ǵana Bozataw rayonınan qaytıwda jaslar festivalınıń ótkerilip atırǵanınan xabar tawıp, sizler menen ushırasıwǵa qarar ettim.  Sebebi men qay jerge barsam, álbette, jaslar menen pikirlesiwge háreket etemen. Sizlerdiń kózińizde, bilimińizde, erteńgi kúnge isenimińizde Jańa Ózbekstandı, Jańa Qaraqalpaqstandı kórip, ózim ushın úlken kúsh-quwat alaman, – dedi Shavkat Mirziyoyev.

 

 

Jaslardı qollap-quwatlaw hám xalıqtıń salamatlıǵın bekkemlew jılında Qaraqalpaqstanda da kóplegen jumıslar ámelge asırıldı. Qala hám rayonlarda 14 jańa mektep qurıldı, 4 joqarı bilimlendiriw mákemesi shólkemlestirildi.

 

– Men hámiyshe jaslar, tálim, bilim-bilim dep aytaman. Bilim «otta janbaydı, suwda shókpeydi». Qansha kóp bilim iyelesek, keleshek bizlerdiki. Úshinshi Renessanstıń tiykarın jaratamız dep ózimizge ideya alǵanbız. Bunıń tiykarın kim jaratadı? Tek ǵana bilimli jaslar, – dedi Prezident.

 

 

Jaslarǵa keń imkaniyat jaratıwǵa qaratılǵan jumıslardıń izbe-iz dawam ettiriletuǵını atap ótildi. Sonıń ishinde, 55 jańa mektep, 187 mektep ushın qosımsha oqıw imaratları qurılıp, 135 mekteptiń kapital ońlanatuǵını aytıldı.

 

Prezidentimiz kelesi bes jılda joqarı bilimlendiriw menen qamtıp alıw dárejesiniń 50 procentke jetkeriliwi, onıń ushın Qaraqalpaqstanda mámleketimiz hám sırt el universitetleriniń 6 abıraylı joqarı oqıw orınları filialları shólkemlestiriletuǵının atap ótti.

 

Sonday-aq, kelesi bes jılda hár bir rayon hám qaladaǵı Jaslar orayları hám ulıwma bilimlendiriw mekteplerinde 100 mıńnan aslam jaslar shet tilleri hám IT texnologiyalarına oqıtıladı. Qosımsha 6 mıń orınlıq jańa jataqxanalar qurıp pitkeriledi.

 

Jaslar Prezident saparın alǵıslar menen qollap-quwatladı.

 

Sonıń menen Prezident Shavkat Mirziyoyevtiń Qaraqalpaqstan Respublikasına saparı juwmaǵına jetti.

 

Derek: kknews.uz