Shavkat Mirziyoyev Ózbekstan Liberal-demokratiyalıq partiyası sezdinde qatnastı

 

Prezident Shavkat Mirziyoyev 9-sentyabr kúni Isbilermenler háreketi – Ózbekstan Liberal-demokratiyalıq partiyasınıń X sezdinde qatnastı.

 

Onda usı jılı 24-oktyabr kúni bolıp ótetuǵın Ózbekstan Respublikası Prezidenti saylawında qatnasıw ushın partiyadan talaban kórsetiw máselesi dodalandı.

 

 

 

Ánjuman qatnasıwshıları bul saylaw áhmiyetli siyasiy waqıya ekeni, Prezidentlikke bilim hám úlken tájiriybege iye, erk-ıqrarlı hám isenimli, jetekshi shaxs talabandı alǵa qoyıw zárúr ekenligin atap ótti.

 

 

 

Partiya elektoratınıń pikirlerin esapqa alǵan halda, Isbilermenler háreketi – Ózbekstan Liberal-demokratiyalıq partiyasınıń sezdi Ózbekstan Respublikası Prezidentligine pútkil is-háreketin xalqımız abadanlıǵına baǵıshlap kiyatırǵan, búgingi qıyın dáwirde mámleketimizdi rawajlandırıwǵa uqıplı bolǵan, óziniń insanıylıq pazıyletleri hám basshılıq qábileti menen watanlaslarımızdıń húrmeti menen mehirine erisken Shavkat Miromonovich Mirziёevtiń kandidaturasın kórsetiw haqqında qarar qabıl etti.

 

 

 

Ózbekstan Respublikası Prezidenti lawazımına talaban Shavkat Mirziyoyev óziniń saylawaldı baǵdarlamasınıń tiykarǵı baǵdarları haqqında bayanat jasadı.

 

 

 

Shıǵıp sóylegenler talabannıń kóp jıllıq basshılıq tájiriybesine iye ekenin, mámleketimizdi rawajlandırıw hám xalqımızdıń abadanlıǵın arttırıw jolında úlken xázmetler islegenin atap ótti.

 

 

 

Sońǵı bes jılda Shavkat Mirziyoyevtiń baslaması hám is-háreketleri menen tariyxıy áhmiyetke iye hákimshilik, huqıqıy hám ekonomikalıq reformalar ámelge asırıldı. Xalıq hákimiyatı bekkemlenip, mámleketlik uyımlardıń esap beriwi támiyinlendi.

 

Usı dáwirde mámleketimiz ekonomikası 24 procentke, sanaat 34 procent, eksport kólemi 1,5 esege, sırt el investiciyalarınıń kólemi bolsa 3 esege arttı. Jalpı ishki ónimimiz 60 milliard dollarǵa jetti. Ortasha miynet haqı 2,2 esege kóbeydi.

 

Partiya elektoratınıń salmaqlı bólegi bolǵan isbilermenler ushın jáne de keńnen imkaniyatlar jaratıldı. Aymaqlardı rawajlandırıw, sanaat hám xızmetlerdiń kólemin keńeytiw ilajları kórildi.

 

Bulardıń barlıǵı, sońǵı nátiyjede, júz mıńlaǵan jańa jumıs orınlarınıń jaratılıwı, xalqımız abadanlıǵınıń artıwına xızmet etip atırǵanı atap ótildi.

 

Insan mápi reformalardıń baslı maqsetine aylandı. Sociallıq baǵdarlanǵan baǵdarlamalar ámelge asırıldı. Ilim, tálim-tárbiya, densawlıqtı saqlaw, mádeniyat hám kórkem óner, ǵalaba xabar quralları, sport tarawların rawajlandırıwǵa da úlken itibar qaratılǵanı atap ótildi.

 

Bunday jańalanıw hám rawajlanıwdı tabıslı dawam ettiriw ushın Shavkat Mirziyoyevti Ózbekstan Respublikası Prezidenti etip saylaw eń durıs jol ekeni haqqında isenimli pikir bildirdi.

 

Sezdde kórip shıǵılǵan máseleler boyınsha tiyisli qararlar qabıl etildi.

 

 

 

Derek: kknews.uz