Áhmiyetli sociallıq joybarlar tanıstırıldı

 

Prezident Shavkat Mirziyoev 11-avgust kúni Surxandár’ya wálayatında ishimlik suwı támiynatın jaqsılaw hám Tashkent qalasında xızmetler tarawında jańa jumıs orınların shólkemlestiriwge baylanıslı joybarlardıń prezentaciyası menen tanıstı.

 

Búgingi kúnde Surxandár’ya wálayatı xalqınıń 46 procenti oraylasqan ishimlik suwı menen támiyinlengen. 218 suw ob’ekti hám 3 mıń   kilometrden aslam tarmaqlar ońlawǵa mútáj. Oálayattıń qubla rayonları  hám Termiz qalasında suwdıń mineralizaciyası muǵdarı artqan.

 

Sonlıqtan  Prezidentimiz 2-iyun’ kúni Surxandár’ya wálayatına saparı waqtında «Tўpalang» suw saqlaǵıshınan ishimlik suwı tarmaǵın tartıw boyınsha kórsetpe bergen edi. Usıǵan muwapıq, dáslepki joybar  islep shıǵıldı.

 

Joybarǵa bola, «Tўpalang» suw saqlaǵıshınıń tómengi bóleginde basımdı óshiriw, suwdı tazalaw hám tarqatıw ob’ektleri qurıladı. Ol jerden  rayonlardaǵı suw bólistiriw  uzellerine shekem ulıwma 361 kilometr qubır tartıladı. Usı sistema nátiyjesinde Sariosiyo, Denaw, Shўrchi, Qumqorǵan, Jarqorǵan, Bandixon, Qızırıq, Sherabad, Angor, Muzrabot, Termiz rayonları hám Termiz qalasındaǵı 1 million  700 mıń  xalıqtıń suw támiynatı jaqsılanadı.

 

 

 

 

Joybardıń ulıwma bahası  138 million dollar bolıwı esap-sanaq etilgen. Onı  2024-jılı iske qosıw rejelestirilmekte.

 

Mámleketimiz basshısı joybardı maqullap, onı basqıshpa-basqısh ámelge asırıw boyınsha kórsetpe berdi. Qurılıs jumısların «Abat awıl» baǵdarlaması menen úylestiriw, suw támiynatı boyınsha mámleketlik-jeke  menshik sheriklikti jolǵa qoyıw zárúr  ekenligin atap ótti.

 

Servis  ekonomikada da, sociallıq turmısta da úlken áhmiyetke iye. Ózbekstan Respublikası Prezidentiniń usı jıl 11-maydaǵı «Xızmetler tarawın jedel  rawajlandırıw ilajları haqqında»ǵı  qararında bul tarawdı  ekonomikada áhmiyetli drayverge aylandırıw hám 2023-jılǵa shekem  xızmetler kólemin eki esege arttırıw maqseti belgilengen. Usıǵan muwapıq,  2021-2023-jıllarda xızmetler tarawın rawajlandırıw boyınsha aymaqlıq baǵdarlamalardı tastıyıqlaw wazıypası qoyılǵan.

 

Bul baǵdarda Tashkent qalasınıń imkaniyatları oǵada úlken. Atap aytqanda, bıyılǵı jıldıń iyun’-dekabr’ aylarında xızmetler tarawında 415 mıń jumıs ornın jaratıw mólsherlengen. Bul reje  jańa  isbilermenlik sub’ektleri  hám kúni-túni isleytuǵın sawda-kewilashar kósheler shólkemlestiriw, ózin-ózi bánt etiw, birinshi qabat hám podvallardı ijaraǵa beriw arqalı ámelge asırıladı. Sonıń ishinde, iyun’-iyul’ aylarında 24 mıń adam ózin-ózi bánt etken, jańa isbilermenlik  sub’ektlerinde 17 mıń puqara jumıslı bolǵan.

 

Prezidentimiz bul tájiriybeni mámleketimizdiń basqa  aymaqlarında da engiziw boyınsha tapsırma  berdi. Nızamshılıqqa ózgerisler kirgizip, xızmet kórsetiwshilerge finanslıq jeńillikler  beriw arqalı olardıń jumısın  rásmyilestiriw áhmiyetli ekenligi atap ótildi.

 

 

 

 

 

 

ÓzA