Өзбекстан Песпубликасы Президенти Шавкат Мирзиёевтиң Наўрыз улыўмахалықлық байрамына бағышланған салтанатлы мәресимдеги қутлықлаў сөзи

Ассалаўма әлейкум, ҳүрметли ўатанласлар!

 

Қәдирли дослар!

 

Сиз, әзизлерди, сизлер арқалы көп миллетли халқымызды шығыстың жаңа жылы ­ Наўрыз байрамы менен шын кеўлимнен қутлықлайман.

 

Нураный ата ҳәм аналарымызға, ҳүрметли аға-ини, әзиз апа-қарындасларымызға, нәўқыран жасларымыз, сүйикли перзентлеримизге, сырт еллердеги ўатанласларымызға ­ пүткил ел-журтымызға өзимниң жоқары ҳүрмет-иззетимди ҳәм ең жақсы тилеклеримди билдиремен.

 

Ҳәммемиз арзыў етип ҳәм сағынып күтетуғын жаңаланыў және жасарыў әййямы ­ Наўрыз байрамы бәршемизге мүбәрек болсын!

 

Уллы Әлийшер Наўайы бабамыз айтқанындай, ҳәр күнимиз Наўрыз болсын!

 

Ҳүрметли ўатанласлар!

 

Өткен жылы пандемия себепли Наўрыз байрамын бурынғыдай үлкен салтанат пенен, кең белгилей алмаған едик. Сонда, бул тәшўишли күнлер әлбетте артта қалады, еле көп той-тамаша ҳәм сейиллерди халқымыз бенен биргеликте өткеремиз, деп жақсы нийет еткен едик.

 

Бүгин мине усы арзыў ҳәм нийетлеримиз жүзеге шықпақта. Гөззал ҳәм жанажан елимизде және шадлықлар, және қуўанышлы күнлер басланбақта.

 

Әлбетте, бәршемиз жақсы түсинемиз, пүткил дүньяда коронавирус бәлеси еле толық сапластырылған жоқ. Тилекке қарсы, ол биз бенен бирге, жанымызда жасамақта.

 

Халқымыздың денсаўлығын сақлаў жолында қандай ҳәрекетлер ҳәм үлкен әмелий жумыслар ислегенимиз бәршеңизге жақсы мәлим. Енди сонша мийнетимиз, көрген илажларымыз бийкарға кетпеўи ушын пандемияға қарсы гүрести бир минут та тоқтатпаўымыз лазым зәрүр. Өзимиз ҳәм жақынларымызды қорғаўымыз, бийпәрўалық ҳәм бийғамлыққа берилмеўимиз шәрт. Бәрқулла сергек ҳәм жуўапкершиликли болып жасаўымыз,  топлаған тәжирийбемизге сүйенип, әлбетте, абайлы болып, системалы жумыс алып барыўымыз зәрүр.

 

Сонда ғана мийнеткеш халқымыз бенен ийгиликли мақсетлеримиз бенен үлкен режелеримизди жаңа күш, жаңа ғайрат пенен даўам еттире аламыз.

 

Бүгин сизлердиң нурлы жүзиңизди көрип, халқымыз да тап гөззал бәҳәр паслындай күш ҳәм қүдиретке толып баратырғанына және бир мәрте исендим.

 

Бәҳәр нәпеси елимиз бойлап гезип атырған мине усындай әжайып күнлерге аман-есен жеткергени ушын Жаратқанға шексиз шүкиршилик айтыў биз ушын ҳәм қарыз, ҳәм парыз.

 

Әзиз ўатанласлар!

 

Пандемия басланған биринши күнлерде мен халқымызға мүрәжат етип, бул сынақтан және де күшли ҳәм қүдиретли болып шығамыз, деп исеним билдирген едим.

 

Ҳақыйқатында да, бизиң күшимиз ­ бирлик ҳәм татыўлықта; бизиң қүдиретимиз ­ меҳир-мүриўбет, өз-ара көмек ҳәм сақаўатта; бизиң табысымыз ертеңги күнге болған жоқары исенимимизде.

 

Бул әдалатлы ҳақыйқатты басымыздан кеширген сынақлы күнлер және бир мәрте дәлилледи.

 

Мине усы машақатлы дәўир бизиң бир-биримизге қаншелли байланыслы ҳәм керек екенимизди айқын көрсетти. Сондай-ақ, бир-биримизди қәстерлеп сақлап, қәдирлеп жасаўымыз турмыслық зәрүрлик екенин толық дәлилледи. Биз тек биргеликте, аўызбиршиликте уллы ислерге уқыплы екенимизди пандемия сынақлары және бир мәрте тастыйықлап берди, десем, сизлер де бул пикирге қосыласызлар.

 

Әлбетте, коронавирус себепли дүньяда көп нәрсе өзгермекте. Лекин, халқымыздың ана-тәбиятқа, муқаддес топыраққа муҳаббаты, әзелий қәдириятларға ҳүрмет ҳәм садықлығы ҳасла өзгерген жоқ. Керисинше, бундай уллы пазыйлетлеримиз және де зыяда болмақта, жетилиспекте.

 

Сонлықтан да әзелден бәҳәрги ояныў ҳәм нәзиклик тымсалы болған Наўрыз байрамы биз ушын кем-кемнен ардақлы болып бармақта.

 

Быйылғы Наўрыздың және бир әҳмийетли тәрепи сонда, ол жанажан Ўатанымыз ғәрезсизлигиниң қутлы 30 жыллық байрамы илажлары өтетуғын жылға туўра келмекте.

 

Наўрыз ­ ҳақыйқый халық байрамы, миллий өзлигимиз айнасы, мәнаўий ҳәм мәдений турмысымыздың ажыралмас бөлеги.

 

Мың жыллар алдын ата-бабаларымыз бул уллы әййямды қандай пәк нийет ҳәм жарқын үмитлер менен күтип алған болса, бүгин де халқымыз мине усындай жоқары кейпият пенен Наўрызды күтип алмақта.

 

Жап-жасыл далалар ҳәм гүлленген бағларда, майдан ҳәм қыябанларда, аўыл ҳәм посёлкаларда, мәҳәлле ҳәм көшелерде Наўрыздың гөззал ырғақлары ­ Жаңа күн намалары жаңламақта. Далаларда мәрт улларымыз көкпары ойнап, гүрес түспекте. Кексе ҳәм жас ўатанласларымыз сүмелек толы қазанлар әтирапында ойын-заўықлар қурып, бәҳәр жемислери ҳәм байрам қуўанышын өз-ара бөлиспекте.

 

Усындай әжайып ҳәм бийтәкирар демлерде бәршемиз тыныш ҳәм татыў турмыс  және қәтержамлық қәдирин және де тереңирек сезинбектемиз.

 

Бүгинги бахытлы ҳәм берекетли күнлерде тәжирийбели дийқан ҳәм фермерлеримиз үлкен нийет ҳәм режелер менен қәдирдан атызына қарай жол алмақта.

 

Пурсаттан пайдаланып, ғайратлы дийқан бабаларымызды жаңа мийнет мәўсими менен қызғын қутлықлаймыз. Усы қутлы байрам күнлеринде быйылғы жылда да атызларда өнимлеримиз мол ҳәм берекетли, ырысқы-несийбемиз және де зыяда болсын, деп бәршемиз дуўа етемиз.

 

Ҳүрметли байрам қатнасыўшылары!

 

Наўрыздың өлмес руўхы ҳәм мәңги философиясы биз бүгин жаратып атырған жаңа Өзбекстан идеясы менен оғада сәйкес ҳәм үнлес.

 

Пүткил дүнья, жер ҳәм көк оянып атырған бул әжайып пасылда елимиздеги жаңа Ояныў дәўири ­ Үшинши Ренессанс арзыўы кеўиллеримизге шексиз күш ҳәм исеним алып кирмекте.

 

Халқымыздың пидәкерлик мийнети, беккем сиясий ерк-ықрарымыз бенен биз кең көлемли реформаларымызды буннан кейин де жедел даўам еттиремиз. Қаншелли қыйын болмасын, ел-журтымыз мәпин, жаннан әзиз перзентлеримиздиң келешегин тәмийинлеўге хызмет ететуғын, таңлаған туўры жолымыздан ҳеш қашан артқа қайтпаймыз.

 

Әне усы мақсетте мәмлекетимизде онлаған заманагөй кәрханалар, санаат аймақлары ҳәм кластерлер, «85-парк» ҳәм технопарклер, транспорт-коммуникация тармақлары, ықшам турақ жайлар, көркем бақша ҳәм мектеплер, жоқары оқыў орынлары, медицина, мәденият ҳәм спорт объектлери қурылмақта. Қала ҳәм аўылларымыздың келбети барған сайын шырай ашып, жанажан диярымыз және де абат ҳәм гөззал болып бармақта.

 

Неге дегенде, Наўрыздың мазмун-мәнисинде инсанды улығлаў, оның қәдирин, иззет-ҳүрметин орнына қойыў сыяқлы ийгиликли пазыйлетлер жәмленген.

 

Елимизде халықтың барлық қатламлары, биринши гезекте, ҳаял-қызлар ҳәм жаслардың машқалаларын шешиў, оларды билим ҳәм кәсип-өнерге үйретиў, жумыс орынлары, дәрамат дәреги, турақ жайлар менен тәмийинлеўге тийкарғы әҳмийет берилмекте. Әсиресе, социаллық жәрдем ҳәм көмекке мүтәж, кеўли ярым инсанларға ҳақыйқый  итибар ҳәм ғамқорлық көрсетиў турақлы жумысларымыздың өлшемине айланбақта.

 

Бул бағдардағы жумысларымыз «Жасларды қоллап-қуўатлаў ҳәм халықтың саламатлығын беккемлеў жылы»нда мазмун ҳәм сапа жағынан пүткиллей жаңа басқышқа көтерилмекте.

 

Мине усындай әмелий ҳәрекетлеримиз келешекте және де кеңейип, «Жаңа Өзбекстанда еркин ҳәм абадан жасайық!» деген жоқары мақсетимизге, әлбетте, жетемиз.

 

Ҳүрметли дослар!

 

Наўрыз ­ инсан ҳәм тәбиятты қәстерлеп сақлаўға, тынышлық, дослық-татыўлық ҳәм шериклик сыяқлы улыўмаинсаныйлық қәдириятларды ҳүрметлеўге шақыратуғын уллы байрам.

 

Усы қутлы әййямда түрли урыс ҳәм жәнжеллер, өкпе-гийнелер умытылады, халықлар арасындағы өз-ара ҳүрмет ҳәм аўызбиршилик тенденциялары және де күшейеди.

 

Мине усындай бийбаҳа пазыйлетлери себепли Наўрыз тек мәмлекетимиз емес, ал, пүткил Шығыс әлеминде заманлар аса мәңги жасап келмекте. Соның ушын да Наўрыз елимизде жасап атырған 130 дан аслам миллет ҳәм халық ўәкиллерин бир шаңарақтай бирлестиретуғын гөззал байрамға айланды.

 

Сизлерге белгили, Бирлескен Миллетлер Шөлкеми тәрепинен 21-март ­ Халықаралық Наўрыз күни деп жәрияланып, ол ЮНЕСКОның Инсанияттың материаллық емес мәдений мийраслары дизимине киргизилген. Бул сәнениң дүнья көлеминде кеңнен белгилениўи оның халықаралық абырайы ҳәм әҳмийети кем-кемнен көтерилип баратырғанынан дәрек береди.

 

Мине усы нурлы әййямда узақ-жақын барлық мәмлекетлердиң халықларына, сырт елли дос ҳәм шериклеримизге ийгиликли қутлықлаўларымыз бенен сәлемлеримизди жоллап, оларға тынышлық ҳәм раўажланыў тилеймиз.

 

Қәдирли аталар ҳәм аналар!

 

Әдиўли апа-қарындаслар!

 

Ҳүрметли аға-инилер!

 

Әзиз перзентлерим ­ нәўқыран жасларымыз!

 

Әййемги ҳәм гөззал байрамымыз ­ Наўрыз бенен бәршеңизди және бир мәрте шын кеўилден қутлықлайман.

 

Шығысқа тән Жаңа жылымыз ҳәр бир шаңараққа, жанажан Өзбекстанымызға тынышлық-қәтержамлық, денсаўлық-аманлық, бахыт-ығбал ҳәм қут-берекет алып келсин!

 

Илайым, жәми уллы мақсетлеримиз, жақсы нийет ҳәм үлкен режелеримиз жүзеге шықсын!

 

Ўатанымыз және де абат, халқымыздың турмысы ҳәмийше абадан болсын!

 

Әзизлерим, Наўрыз байрамы бәршемизге, пүткил халқымызға қутлы ҳәм мүбәрек болсын!