Жоқарғы Кеңес Баслығы Республикамыз ҳаял-қызларын байрам менен қутлықлады

 

6-март күни Нөкис қаласында 8-март – Халықаралық ҳаял-қызлар байрамы мүнәсибети менен салтанатлы илаж өткерилди. Онда республикамыздың барлық қала ҳәм районларынан келген нураный аналар, жәмийетлик турмыста белсендилик көрсетип атырған ҳаял-қызлар, түрли министрлик ҳәм мәкемелер ўәкиллери қатнасты.

 

Илажда Қарақалпақстан Республикасы Жоқарғы Кеңесиниң Баслығы М.Камалов қатнасып, республикамыз ҳаял-қызларын байрам менен қутлықлады.

 

 

Атап өтилгениндей, Ҳүрметли Президентимиз басшылығында бүгинги күнде елимизде ҳаял-қызларға ғамқорлық көрсетиў, оларды ҳәр тәреплеме қоллап-қуўатлаў, жәмийетлик-сиясий, социаллық-экономикалық турмыстағы белсендилигин арттырыўға айрықша итибар қаратылмақта. Елимизде гендер теңликти тәмийинлеў, ҳаял-қызларды жәмийетимиздиң барлық тараўларында өз қәбилетин, потенциалын көрсетиўине кеңнен жол ашыў, оларды кәсип-өнерге, исбилерменликке үйретиў, социаллық қорғаўға мүтәж ҳәялларға жәрдем көрсетиў мақсетинде «Ҳаяллар дәптери»н енгизиў, жоқары оқыў орынларында билим алып атырған қызлардың шәртнама төлемлерин төлеп бериў, пидайы, талантлы ҳаял-қызлардың мийнетин мүнәсип баҳалаў сыяқлы бир қатар жумыслардың әмелге асырылып атырғаны аналарымызға, апа ҳәм қарындасларымызға, дилбар қызларымызға деген айрықша итибар ҳәм ғамқорлықтың көриниси саналады.

 

 

Буның нәтийжесинде ҳаял-қызларымыз илим, билимлендириў, медицина, мәденият, спорт, санаат, аўыл хожалығы сыяқлы жәмийетимиздиң ең әхмийетли тараўларында табыслы жумыс алып бармақта. Олар арасынан көплеген депутатлар, илим докторлары, жазыўшы-шайырлар, исбилерменлер елимиздиң  сиясий, социаллық-экономикалық турмысында белсене қатнасып, оның гүллеп-раўажланыўына мүнәсип үлесин қосып келмекте.

 

Өзбекстан Республикасы Президентиниң 2021-жыл 4 марттағы «8-март – Халықаралық ҳаял-қызлар күни мүнәсибети менен сыйлықлаў ҳаққында»ғы пәрманына мүўапық елимизде алып барылып атырған түпкиликли реформаларда белсене қатнасып, жаңа Өзбекстанды қурыў, халқымыздың абадан турмысын жетилистириў жолында баслама ҳәм ибрат көрсетип киятырғаны ушын 8 ҳаял-қызларымыз ҳүрметли атақ, орден ҳәм медальлар менен сыйлықланды, сондай-ақ, усы жыл 3-марттағы қарары менен 2 қызымыз өзиниң таланты ҳәм ибратлы жумысы менен жасларға өрнек  болып атырғаны, жәмийетлик турмыста белсендилик көрсетип атырғаны ушын Зульфия атындағы Мәмлекетлик сыйлығы менен сыйлықланды.

 

Салтанатлы илажда бир топар пидайы ҳаял-қызларымыз Қарақалпақстан Республикасы Жоқарғы Кеңеси Президиумының арнаўлы Қарары менен “Ардақлы нураный”, “Ўатан пидайысы” ҳәм “Үмит ушқыны” көкирек белгилери, Қарақалпақстан Республикасы Министрлер Кеңесиниң «Ҳүрмет жарлық»лары менен сыйлықланды. Сондай-ақ, мәмлекетлик ҳәм жәмийетлик турмыстағы белсендилиги, өзлериниң жоқары нәтийжели мийнети менен ажыралып киятырған бир топар ҳаял-қызларымызға «Мўътабар аёл» көкирек белгилери тапсырылды.

 

 

 

 

 

 

 

 

 

 

 

Сыйлықланғанлар атынан сөзге шыққанлар ҳаял-қызларға қаратылып атырған үлкен меҳир ҳәм айрықша итибар ушын Ҳүрметли Президентимизге, елимиз басшыларына өз миннетдаршылығын билдирди.

 

 

 

 

 

 

Илаж көркем өнер шеберлериниң концерт бағдарламасы менен даўам етти.

 

Бундай илажлар республикамыздың барлық қала ҳәм районларында болып өтпекте.

 

Қарақалпақстан Республикасы Жоқарғы Кеңесиниң баспасөз хызмети