Халықты сапалы ишимлик суўы менен тәмийинлеўди жақсылаў бойынша әмелге асырылып атырған ис-илажлар ҳәм келеси жыллар режелери темасында баспасөз конференциясы

Қарақаплақстан Республикасы Үй-жай коммунал хызмет көрсетиў министрилгиниң басламасы менен 2019-жылдың 30-ноябрь күни Қарақалпақстан Республикасы Мәҳәлле қорының мәжилислер залында “Халықты сапалы ишимлик суўы менен тәмийинлеўди жақсылаў бойынша әмелге асырылып атырған ис-илажлар ҳәм келеси жыллар режелери” темасында баспасөз конференциясы шөлкемлестирилди.

Баспасөз конференциясына Үй-жай коммунал хызмет көрсетиў министрлиги, “Туйемойын-Нөкис” регионаллық суў тармағынан пайдаланыў басқармасы” МУК кәрханасынан тийис қанигелери, Қарақалпақстан Республикасы Министрлер Кеңеси Баслығының баспасөз хызмети ҳәм республикалық ғалаба хабар қураллары ўәкиллери қатнасты.

Баспасөз конференциясын Қарақалпақстан Республикасы Министрлер Кеңеси Баслығының баспасөз хаткери Ч.Елмуратов алып барды ҳәм республикамызда ишимлик суў тәмийнатын жақсылаў бойынша алып барылып атырған жумыслар ҳаққында тоқтап өтти.

Күн тәртибиндеги биринши мәселе бойынша “Туйемойын-Нөкис” регионаллық суў қубырынан пайдаланыў басқармасы” МУК директоры ў.ў.а М.Утениязов “Қарақалпақстан Республикасының халқын орайласқан ишимлик суўы менен тәмийинленгенлиги ҳәмде 2020-жылда ишимлик суў системаларын раўажландырыў бойынша белгиленген ең әҳмийетли ўазыйпалар” ҳаққында шығып сөйледи.

Ол өз сөзинде Ҳүкиметимиз тәрепинен қабыл қылынып атырған қарарлар тийкарында республикамызда ишимлик суў объектлерин ҳәм тармақларын жаңадан қурыў ҳәм реконструкциялаў бойынша кең көлемдеги жумыслар әмелге асырылып атырғанлығы, соннан 2019-жылда 137,9 млрд сумлық қаржылар есабынан 113 объектде 473 км ишимлик суў тармақлары, 1 дана суў бөлистириў станциясы ҳәм 16 дана суўды душшыландырыўшы станцияларды қурыў ҳәм реконструкциялаў жумыслары әмелге асырылғанлығы, сондай-ақ келеси 2020-жылда “Ишимлик ҳәм ақаба суў системасын раўажландырыў” жамғармасы есабынан 50,1 млрд сумлық ҳәм “Арал бойы аймағын раўажландырыў қоры” есабынан 56,2 млрд сумлық ишимлик суў тармақларын қурыў ҳәм реконструкциялаў жумыслары әмелге асырыў режелестирилгенлигин айтып өтти.

 

Күн тәртибиндеги екинши мәселе бойынша Қарақалпақстан Республикасы Үй-жай коммунал хызмет көрсетиў министрлигиниң басқарма баслығы Н.Султанов “Қарақалпақстан Республикасында халықаралық финанс институтларының кредит қаржыларын киритиў арқалы халықты сыпатлы ишимлик суў менен тәмийинленгенлик дәрежесин асырыў бойынша келеси жылларға белгиленген ўазыйпалар” ҳаққында баянат жасады.

Ол өз баянатында республикамызда ишимлик суў тәмийнатын жақсылаў бойынша халықаралық финанс институтлары қатнасында бир қанша жумыслар әмелге асырылып атырғанлығы, соның ишинде Азия раўажланыў банкиниң қатнасында баҳасы 172,0 млн.доллар қаржылар есабынан 2019-2023-жылларда Қарақалпақстан Республикасының Әмиўдәрья, Беруний, Қараөзек, Қоңырат, Нөкис ҳәм Мойнақ районлары ҳәмде “Туйемойын 2-көтерме насос станциясын модернизация қылыў” жойбарын әмелге асырыў, Азия инфраструктура инвестициялар банкиниң 77,0 млн.доллар қаржылары есабынан 2019-2023-жылларда Нөкис қаласы, Бозатаў, Қанлыкөл, Кегейли, Тахтакөпир, Тахиатас, Төрткүл, Хожели, Шымбай, Шоманай ҳәм Елликқала районларының ишимлик суў тәмийнатын модернизация ҳәм реконструкция қылыў белгиленгенлигин айтып өтти.

Илаж соңында сораў-жуўаплар болып өтип, ғалаба хабар қураллары ўәкиллери өзлериниң қызықтырған соның менен бирге сын көз қарастағы сораўларына тийисли қәнигелерден жуўаплар алды.

Қарақалпақстан Республикасы Үй-жай коммунал хызмет көрсетиў министрлиги Баспасөз хызмети.