“Порлытаў”да суў душшыландырыўшы насос станциясы пайдаланыўға тапсырылды

Мойнақ районы “Мәдели” аўыл пуқаралар жыйнында “Порлытаў” суў душшыландырыўшы насос станциясы пайдаланыўға тапсырылды.


Усы мүнәсибет пенен болып өткен илажда Мойнақ районы ҳәкими Е.Еденбаев, Қарақалпақстан Республикаси Турақ-жай коммуналлық хызмет көрсетиў министри Р.Сеитов, сондай-ақ, районлық тийисли мекеме, шөлкемлердиң баслықлары ҳәм аймақ турғынлары қатнасты.

Арал бойы аймақларын раўажландырыў қорының 2 млрд 154 млн сумлық қаржылары есабынан реконструкцияланған бул объект аймақтағы 1150 пуқараны ишимлик суўы менен тәмийинлеўге толық мүмкиншилик жаратады.

Район ҳәкими Е.Еденбаев ҳәм Турақ-жай коммуналлық хызмет корсетиў министри Р.Сеитовлар өз сөзинде аймақ турғынларын Ғәрезсизлигимиздиң 28 жыллық байрамы ҳәм ашылыў мәресими менен қызғын қутлықлады ҳәм Мойнақ районы халқын таза ишимлик суўы менен тәмийинлеў бағдарында алып барылып атырған жумысылар ҳаққында тоқтап өтти.

Атап айтқанда, районда 2019 жыл инвестиция бағдарламалары тийкарында жәми 11 объектте қурылыс-реконструкция жумысларын алып барыў режелестирилген.

Таза ишимлик суўы бағдарламалары тийкарында райондағы “Таллы өзек”, “Арал” ҳәм “Жайхун” АПЖларына 2,35 км ишимлик суў тармақларын улыўма қурыў ҳәм 3-басқыш насос имаратына 2 дана насос агрегатларын орнатыў режелестирилген болып, бул жумысларға жәми  837,2 млн. сўм қаржылар ажратылған.

Арал бойы аймақларын раўажландырыў қоры қаржылары есабынан улыўма муғдары 1 млрд 615,1 млн сўмлық “Бозатаў” АПЖ Шағырлы аўылында 8,9 км, “Жайхун” АПЖда 1,02 км ишимлик суў тармақларын тартыў, “Мәдели” АПЖның Порлытаў аўылында суўды душшыландырыў насос станциясын реконструкциялаў ҳәм 7,5 км ишимлик суў тармақларын тартыў жумыслары алып барылды.