Жаңа энергия қуўатлықлары санааттың раўажланыўына сүйениш болады

Тақыятас ыссылық электр станциясында ҳәр бири 230-280 мегаватт қуўатлылыққа ийе болған еки пуў-газ қурылмасы қурылмақта.

Президент Шавкат Мирзиёев Қарақалпақстанға сапары ўақтында усы инвестиция жойбары менен әмелге асырылып атырған жумыслар менен танысты.

– Елимизде санаатты санаатты раўажландырыў бағдарында  үлкен шеклерди ийеледик, тиккелей шет ел инвестицияларын тартпақтамыз. Булар ушын бәринен бурын беккем инфраструктура керек. Бул жойбар Қарақалпақстан ҳәм Хорезмде энергия тәмийнатын жақсылаў, халыққа гүз-қыс мәўсиминде де үзликсиз электр қуўатын жеткерип бериўде оғада әҳийетли,–деди мәмлекетимиз басшысы.

Бундай стратегиялық жумыслар басқа аймақларда да әмелге асырылмақта. Атап айтқанда, Төреқорған ыссылық электр станциясы қурылмақта, Наўайы ыссылық электр станциясы менен Ферғана ыссылық электр орайы модернизацияланбақта.

Тақыятас  ыссылық электр станциясы олардың төртиншиси.

Президентимиздиң 2017-жыл 11-сентябрдеги қарары тийкарында әмелге асырылып атырған усы жойбардың улыўма баҳасы 678,2 миллион долларды қурайды. Еки пуў-газ қурылмасының иске қосылыўы нәтийжесинде станцияның улыўма қуўатлылығы 730 Мвттан 1003 МВтқа шекем артады. Жылына 488,6 миллион куб метр тәбийғый газдиң үнемлениўине ерисиледи. Сондай-ақ, жыллық суўдың жумсалыўы 293 миллион куб метрге азаяды. Жүзге шамалас жаңа жумыс орны жаратылады.

Тақыятас ЫЭСда биринши пуў-газ үскенеси усы жыл ноябрде, не усындай қуўатлылыққа ийе екинши үскене келеси жылдың январь айында иске қосылады.

Жойбар Қубла Кореяның “Ҳюндаи Енгинееринг Cо. Лтд.” ҳәм “Ҳюндаи Енгинееринг & Cонструcтион Cо. Лтд.”компаниялары менен биргеликте әмелге асырылмақта. Мәмлекетимиз басшысы усы компаниялардың ўәкиллери менен сәўбетлести.

Усының менен Президентимиздиң Қарақалпақстан Республикасына сапары жуўмақланды.

 

 

Дерек:
ҚАРАҚАЛПАҚСТАН РЕСПУБЛИКАСЫНЫҢ МӘМЛЕКЕТЛИК ҲҮКИМЕТ ПОРТАЛЫ