Қарақалпақстан белсендилери менен шын-жүректен сәўбет

Президент Шавкат Мирзиёев  Мойнақ районындағы мәденият орайында қарақалпақстанлы белсендилер менен сәўбетлести.

Мәмлекетимиз басшысы жыйналғанларды жақынласып киятырған Ғәрезсизлик байрамы менен қутлықлап, қарақалпақ елине жоқары ҳүрмет ҳәм итибарын билдирди.

– Сизлер менен бирге үлкен жумысларды басладық. Ҳәр бир аймақтың дәртин тыңлайық, ҳәр бир инсанның ишине кирип барайық, ертеңги күге исенимин оятайық, деп үлкен реформаларды әмелге асырмақтамыз. Адамлар ертең емес, алыс келешекте емес, ал бүгин жақсы жасаўы керек,– деди Президент.

Усы сиясаттың нәтийжеси Қарақалпақстанда да айқын сәўлелениўин тапқан.

Аралбойы халқының турмысын жақсылаў ҳаққындағы сөзлер 50 жыллардан берли  бар гәп. Бирақ, соңғы еки жылда исленген жумыслар өз алдына.

Шавкат Мирзиёевтиң басламасы менен БМШ қатнасында Аралбойы регионы ушын көп шериклик тийкарындағы Траст фонды дүзилди. Өзбекстан Республикасы Президенти жанындағы Аралбойы халықаралық инновациялық орайы, Аралбойында инновацияларды қоллап-қуўатлаў фонды шөлкемлестирилди. Теңиздиң қурыған ултанында қорғаў тоғайзарлықлары, Әмиўдәрья делтасында киши суў бассейнлери қурылмақта.

Мәмлекетимиз басшысының 2017-жыл 28-февралдағы қарарына муўапық Мойнақ районын социаллық-экономикалық раўажландырыў ҳәм халықтың бәнтлигин тәмийинлеў бойынша да бир қатар жумыслар әмелге асырылды.

Президентимиздиң өткен жылы 15-ноябрдеги сапары ўақтында белгиленген ўазыйпалар тийкарында ҳүкимет бағдарламасы қабыл етилди. Район орайында мәмлекетлик хызметлер орайы, амфитеатр, бассейн, спорт залы, музыка ҳәм көркем өнер мектеби, медицина мәкемеси ҳәм басқа да объектлер қурып питкерилди. 20 көп қабатлы турақ-жайлар қурылмақта.

Шын жүректен болып өткен ушырасыўда Нөкис қаласы ҳәм барлық районлардан келген ўәкиллер Мойнақтағы өзгерислерге ҳәўес еткенин атап өтип, өзлери жасап атырған орынлардағы кемшиликлер менен әҳмийетли мәселелерди айтты. Оларды шешиў бойынша жуўаплы басшыларға тапсырмалар берилди.

– Үлкен имаратлар, заманагөй техникалар менен мақтаныў керек емес. Ақыллы, билимли, пидайы перзентлерди тәрбияласақ ҳәм олар Ўатанымызға хызмет етсе, ең үлкен байлық, бахыт мине, усы болады, – деди мәмлекетимиз басшысы.

Дерек: ҚАРАҚАЛПАҚСТАН РЕСПУБЛИКАСЫНЫҢ МӘМЛЕКЕТЛИК ҲҮКИМЕТ ПОРТАЛЫ