Қарақалпақстан жалпы аймақлық өниминде санааттың үлеси 41 процентке жетти

Өзбекстан Республикасы Президенти Шавкат Мирзиёевтың басшылығында Қарақалпақстан Республикасы Жоқарғы Кеңесинде болып өткен ушырасыўда Қарақалпақстанның экономикасын раўажландырыў мәселелери додаланды.

Бул ҳаққында Өзбекстан Республикасы Президентиниң Баспасөз хызмети хабар берди.

Инвестиция орталығының жақсыланғаны, зәрүрли шараятлардың жаратылғаны нәтийжесинде соңғы еки жылда Қарақалпақстанның жалпы аймақлық өниминде санааттың үлеси 36 проценттен 41 процентке артқаны атап өтилди.

Өнерментлерди ҳәр тәреплеме қоллап-қуўатлаў бойынша көрилген илажлардың нәтийжесинде олардың саны жыл басындағы 460 тан 1 мың 480 ге көбейгени атап өтилди.

Мәмлекетимиз басшысы көбирек жумыс орынларын жаратыў, бул ушын жаңа кәрханалар шөлкемлестириў ҳәм ҳәрекеттегилерин кеңейтиў бойынша тапсырмалар берди.

2019-2020-жылларда Қарақалпақстанда санаат, хызмет көрсетиў ҳәм аўыл хожалығы тараўларын раўажландырыў бойынша 1 мың 18 инвестициялық жойбар ислеп шығылған. Бул мақсетлер ушын 11 триллион сум, соның ишинде, 895 миллион доллар тиккелей шет ел инвестицияларын бағдарлаў режелестирилген.

Мысалы, келеси жылы Қараөзек районында Қубла Корея менен биргеликте жылына 3,4 миллион тонна цемент ислеп шығаратуғын заводтың қурылысы басланды. Мойнақ районында балықты конвервалаў, Тақыятас районында мәкке-жүўерини қайта ислеў ҳәм қағаз ислеп шығарыў кәрханалары шөлкемлестириледи.

Дерек: Қарақалпақстан Республикасы Министрлер Кеңесиниң Мәлимлеме хызмети